Dic Christi Veritas
attributed to Philippe de Grève (c. 1160-1236)

Dic Christi Veritas
dic cara raritas,
dic rara Caritas,
ubi nunc habitas,
aut in valle Visionis,
aut in throno Pharaonis,
aut in alto cum Nerone,
aut in antro cum Timone,
viscella scirpea
cum Moyse plorante,
vel in domo Romulea
cum Bulla fulminante?

Bulla fulminante
sub iudice tonante,
reo appelante,
sententia gravante,
veritas opprimitur,
distrahitur et venditur,
iusticia prostante.
itur et reccuritur
ad Curiam, nec ante
quis quid consequitur,
donec exuitur
ultimo quadrante.

Respondit Caritas;
homo, quid dubitas,
quid me sollicitas?
non sum quod usitas
nec in euro nec in austro,
nec in foro nec in claustro,
nec in bysso nec in cuculla,
nec in bello nec in bulla.
de Iericho sum veniens,
ploro cum sauciato
quem duplex Levi transiens
non astitit grabato.

Views: 31